Acadar unha
boa afinación é imprescindible para calquera músico que se prece, mais
non é doado.
Na afinación
do pito vai influír fundamentalmente:
•
A calidade do instrumento
depende da madeira empregada para a súa
construción e da habilidade do artesán que lle dá forma.
•
A súa lonxitude
fai que o conxunto da súa afinación sexa
máis ou menos alta, de aí que cada instrumento varíe o seu tamaño en
función da súa tonalidade. Tamén inflúe cando metemos ou sacamos o
espigo.
•
A intensidade do soprido
debe facer que as notas da escala estean
afinadas entre si, e que ese equilibrio sexa extensible a todo o
rexistro do instrumento. A maior intensidade no sopro, maior altura no
son, e a menor intensidade, menor altura.
•
A temperatura ambiente
sube ou baixa a altura do son dependendo de se esta é maior ou menor,
respectivamente. Deste xeito para acadar a mesma afinación dunha nota
nun día frío temos que meter o espigo para subir en altura e nun día
quente, sacalo para baixar.
Dando por
suposto que temos un instrumento de calidade e unha temperatura ambiente
normal, a nosa preocupación deberase centrar nos puntos 2 e 3; é dicir,
na lonxitude e na intensidade do sopro.
Se está
tocando un só, debe centrar a atención no punto 3; é dicir, que o
instrumento soe afinado no seu conxunto, independentemente de se ten ou
non un la a 440 Hz.
Se
pretendemos tocar con outros instrumentos, debemos mesturar os puntos 2
e 3; xa non se trata só de que as notas do noso instrumento estean
afinadas entre si, senón que deben estar á mesma altura das do
instrumento ou instrumentos cos que pretendemos tocar.
Se
empregamos vibrato cando tocamos, debemos ter moito coidado, pois tamén
afecta á afinación.
Vibrato
O vibrato
consiste nunha "flutuación" ou oscilación do son na frauta, é dicir,
subidas e baixadas de forma regular da nota tanto en afinación como en
volume. Nas frautas, o seu uso universalizouse no s. XX, en aumento
progresivo desde o s. XVIII. O número de oscilacións vén variando
aproximadamente entre 4 e 7 por segundo, depende do gusto de cada
músico, mais debe variar tamén en función do carácter e o tempo da peza
que toquemos. Unha vez interiorizado, débenos saír dun xeito natural,
sen esforzo. No pito podemos facer dous tipos de vibrato:
•
Vibrato de sopro
•
Vibrato de dedo
